首先,係冇諗過要搞七個月 展示吓個成品先:https://youtu.be/o9wHhiAjL6w 過咗南洋後有個習慣,係喺YouTube上面四週睇,搵啲歌嚟練吓。目標好簡單,最好係三分鐘內,因為唔洗練好耐;又可以當練習背咗佢,之後隨時可用——萬一去到啲有部鋼琴當裝飾品既場合,俾人知道識彈琴就實會「獲邀」(其實係被逼居多)要彈幾吓「表演」(當眾出醜是也)吓。 唔知呢啲算係乜嘢「社交禮儀」:一般人自以為係「出於禮貌」要邀請、彈琴嗰個又要「出於禮貌」敷衍幾吓。但其實叫人彈嗰個自己一係唔識一係其實唔想聽、彈嗰個又唔係靠彈琴搵食鬼會一坐低就彈到呢。我記得中一時有個聽講係跑馬頭既器樂老師都同我講過,隨時都要有幾首歌彈吓——做乜彈琴要搞到咁麻煩? 後來,個社會變態到學音樂入學有分加而彈琴「因為太普通」所以又唔算數就更加痴線啦。 講返轉頭,我喺YouTube遊嗰陣,搵到一隻兩分鐘左右,由日本音樂家marasy8 在2009年未夠廿歲時上載的一首鋼琴協奏曲「蠍火」(Anti-ares)的鋼琴獨奏曲濃縮版。兩分鐘之間,琳瑯滿目,大小快慢厚薄悲喜一應俱全,唔難聽又好睇(非常重要),一睇就知「就係佢喇」。跟住再搵落去,發覺呢隻歌係機舖鍵盤遊戲beatmaniaIIDX隱藏關卡(即爆咗機先有得玩嗰啲)既歌,而首歌係遊戲公司自己搵人仿Rachmaninov作既(所以睇落好睇、彈落好難、內容又十分豐富)。遊戲版本就係約兩分半鐘,不過marasy超快手就兩分鐘搞掂。

首先,係冇諗過要搞七個月

展示吓個成品先:https://youtu.be/o9wHhiAjL6w

過咗南洋後有個習慣,係喺YouTube上面四週睇,搵啲歌嚟練吓。目標好簡單,最好係三分鐘內,因為唔洗練好耐;又可以當練習背咗佢,之後隨時可用——萬一去到啲有部鋼琴當裝飾品既場合,俾人知道識彈琴就實會「獲邀」(其實係被逼居多)要彈幾吓「表演」(當眾出醜是也)吓。

唔知呢啲算係乜嘢「社交禮儀」:一般人自以為係「出於禮貌」要邀請、彈琴嗰個又要「出於禮貌」敷衍幾吓。但其實叫人彈嗰個自己一係唔識一係其實唔想聽、彈嗰個又唔係靠彈琴搵食鬼會一坐低就彈到呢。我記得中一時有個聽講係跑馬頭既器樂老師都同我講過,隨時都要有幾首歌彈吓——做乜彈琴要搞到咁麻煩?

後來,個社會變態到學音樂入學有分加而彈琴「因為太普通」所以又唔算數就更加痴線啦。

講返轉頭,我喺YouTube遊嗰陣,搵到一隻兩分鐘左右,由日本音樂家marasy8 在2009年未夠廿歲時上載的一首鋼琴協奏曲「蠍火」(Anti-ares)的鋼琴獨奏曲濃縮版。兩分鐘之間,琳瑯滿目,大小快慢厚薄悲喜一應俱全,唔難聽又好睇(非常重要),一睇就知「就係佢喇」。跟住再搵落去,發覺呢隻歌係機舖鍵盤遊戲beatmaniaIIDX隱藏關卡(即爆咗機先有得玩嗰啲)既歌,而首歌係遊戲公司自己搵人仿Rachmaninov作既(所以睇落好睇、彈落好難、內容又十分豐富)。遊戲版本就係約兩分半鐘,不過marasy超快手就兩分鐘搞掂。

網上仲有好幾個版本,其中有幾個係七八分鐘既,彷彿係「原曲」既「完整版」,當中有四個我特別鐘意:nekotaro2014 收錄既八分鐘版本係完整既管絃樂伴奏既版本(應是用電子音樂彈奏既),佢各種器樂既運用對我日後練琴時選擇用邊種觸感同反應好有幫助;TeirusuFX 收錄既九分半鐘DIRGE管絃樂版本亦十分精彩,因為俾我知道啲隨時快慢增減速可以去到幾盡(縱使呢個版本有啲太膩,聽到我暈暈哋);PianoplayerElijah既真人演出7:40版實實在在咁展現咗成隻歌由真人彈時既效果,尤其是喺一啲聽落超難既地方點樣去實際處理;Cateen 角野隼斗既七分鐘演奏廳版本就係我既模範,雖然網上有人話佢既演出只係「半專業」,但我練咗七個月既感覺係,要彈到有佢七八成既水準,基本上已係所有業餘彈琴既人既極限。

搵到歌之後就搵譜啦。呢啲新作既歌喺IMSLP係唔會搵到既,所以我又喺YouTube搵。唔係咁易啦。我曾嘗試聯絡Cateen問吓佢出唔出譜,最多我咪俾錢買囉,佢當然識我係阿水,已讀不回啦。網上亦有日本書局有譜賣,但睇過一兩頁sample覺得同我上面講既四個較佳版本都差好遠,所以冇買到啦。

咁又過咗幾個月。有日,喺YouTube遇到一個Ayato Fujiwara戶口出既琴譜,聲稱係仿marasy8既,咪cap screen一版版噉抄落嚟,殺住先跟住練囉。兩分鐘既歌仔都練咗足足兩個月,主要係想模仿marasy8既速度,但不得不承認係超越我既認知水平既,所以草草錄咗個2:40既版本留個紀錄就算。

喺呢個時候,即七個月前,我覺得既然有個兩分鐘既底,咪練埋其他章節,夾埋就有七八分鐘,叫做成首完成啦。不過當時我搵唔到我最鐘意既Cateen版本,YouTube 上幾個版本都係似俾電腦彈多過人彈,搞咗一輪就決定用L e o p a r d 個版本做基礎,然後個別章節(尤其是入正題前嗰八個小節倒瀉籮蟹既快版)就聽睇Cateen個版逐個音自己默出嚟改譜啦。

練咗三個幾月,開始有啲眉目,有啲似樣時,喺YouTube見到Jasper Hu放咗個聲稱係Cateen版既琴譜,我當然又cap圖自制譜啦。呢個版本同Cateen至少95%相似,唔過檔練呢個版本就浪費啦。不過Cateen版本相較其他幾個版本,係刪減咗兩個章節既,一個係慢嗰段原本分幾鐘,Cateen縮到八個小節就算;另一個係pre-Cadenza 階段有一段聽落都幾好玩既「極速滾動」,Cateen直頭成段唔要。我向來心急,慢嗰段唔要就罷,快嗰段就唔想嘥咗佢,所以喺砌譜時就用翻L e o p a r d 個版本移花接木噉駁返落去Jasper Hu個版本度。

跟住就又過咗差唔多三個月。呢個時候已喺度努力背譜,希望可以三月生日時錄返個完整版。但又有變。

Cateen出琴譜呀!!!!!

折騰咗成年,終於(又竟然)等到。我二話不說,即訂啦,就算要搏由日本寄包裏入境會被隨意打稅,都要買。

其實都已經大致練好,份譜係留為紀念居多。加上份譜寄到時,自己因染疫受強制隔離,又少咗幾日。點都好啦,攞住份譜時嗰種感動實在難以用文字形容。

到生日錄影時,搞咗成日都唔掂啦,始終一有鏡頭對住就緊張,一緊張就錯。以前錄親都係三兩分鐘點都碌得過,不過早前錄隻莫扎特時五分鐘已發覺自己handle唔到,結果要剪接三個版本馬虎了事。今次就成八分鐘,仲要係一隻由頭到尾都冇一句重覆既歌,就更難啦。其中自己加入去嗰段「極速滾動」先係問題所在,因為彈咗成五分鐘先到,所以去到嗰段已非最佳狀態(畢竟唔係專業演奏嘛),屢次原來既「滾動」都變成裙拉褲甩。後來抽出嚟特登仔細練都事倍功半,吋進艱難;唔怪得Cateen要cut咗呢段啦。最後由早錄到晚,臨天黑有一次冇乜大錯既就求其upload啦。

之後覺得彈得唔夠好,再練過啦。呢次重可以重頭慢慢拜讀Cateen份譜,改翻啲可以改善音樂效果既部份。至少「極速滾動」部份,可以再加強練習,冇非又係「分手」、「減速」、「固定位置」等基本揼石仔手法嚟提高穩定性。當然,亦要多聽原曲,就發現上次錄影時彈唔到既主因係衝得太快,衝到自己都彈唔到就點都埋唔到周啦。

又過咗一個月,去到復活節前,亦係印支半島過年時。趁有幾日假,就再錄過,彈咗四次就搞掂。唔係完美(唔好發夢啦),有幾個地方識首歌既就有機會會發現有錯;但既然都去到呢步,算啦,強求恐怕也不見得會再有幾多改善。

下一步:要一個屬於自己既三分鐘版本。畢竟八分鐘太長,亦難以長期維持水準。三分鐘又可招呼班唔識趣見琴就叫人彈既「朋友」,自己又唔洗付出太多去keep住,咁我就可以move on去搵下隻歌去彈喇。

--

--

K576第三樂章

呢個樂章前後一共用咗成三個月先練好背埋錄得。背歌難,要追得上速度而又彈得啱仲難。每四個小節就有唔同既花樣,梅花間竹咁,所以要抽一小句出嚟練其實都幾麻煩;呢啲歌一句接一句,幾呼冇停手,要反覆操練嗰啲十六分既三連音要多花心思,剪裁好要練既小節先可以開始。

彈呢啲標準到唔恨既古典音樂最大既樂趣係,可以worry free咁不停咁彈,彈好多次都唔會悶。只係啲滾動式既快速樂句,彈得快時又會出汗,要開住風扇彈先可以彈好耐。以前都講過啦,彈古典音樂既嘢,最大既好處係彈熟咗就可以進入冥想既境界,放鬆心裡腦悝面既煩結,係調劑心情既好方法。

呢首K576,上網睇係莫扎特最難彈既奏鳴曲。睇譜係睇唔出咁撓手指,練落先知難彈。點都好啦,終於玩晒。三個樂章都喺自己彈到「咁上下」既水準時錄低咗,之後彈唔返都唔懊悔。

可以去玩其他彈喇!

--

--

三個月前寫過一篇講莫扎特既奏鳴曲,當時就係剛剛開始彈呢首歌,摸緊啲音既階段。擾擾攘攘咗幾個月,背咗首歌,想喺叫做彈得熟時錄低咗佢,免得生疏之後彈唔返又唔想又頭練過。

結果搵咗日公假冇咩嘢做(因為瘟疫強勢回歸又就快封城喇),一頭汗咁錄足一日。

查實自己平時彈,有啲甩漏冇乜所謂,自己爽就得。到要錄底時,好多平時唔覺唔覺既窿就萬倍放大出嚟,心緒總是不靈,每一猶疑就彈錯,一錯就兜唔返,好好地一首歌就咁冚包散。

所以去到最後,要剪埋三個片斷先至成到一隻「聽」落完整既版本。「睇」就唔完整喇,次次彈時體位都唔同,大家唔介意就唔好睇齋聽啦。

為咗整條片,又逼自己學多咗少少iMovie既剪接功能——我就係咁即食,即學即用;日常想認真學,一係就半途(其實係十劃得一撇時)而廢,一係就水過鴨背,轉頭就唔記得。上次用iMovie時已係被迫(又係被迫)要整條三幾分鐘既所謂童年片結婚party時用,當時學到啲嘢,今次都算用得返吓。

至於點解揀呢首歌?我都係睇返LRSM 個syllabus有呢隻歌可以攞嚟玩吓,慰藉吓自己雖然過咗廿幾年,而家仍可以扮自己有呢個程度咁啦。後來練得辛苦,份譜睇落冇嘢但彈極都手指打結,上網週圍google吓,發覺原來呢首都算得上係公認莫扎特最難彈既奏鳴曲。

既然係咁,就唔爭在彈埋第二同埋第三段啦。等我。

--

--

花咗三個禮拜練一首歌當係生日前既挑戰後,除咗喺呃咗一推仲用緊臉書既朋友既like之外,亦俾個機會自己審視吓生活既態度同方向。固然我可以柴娃娃咁求其彈,搞吓呢搞吓路,不過咁樣係無法維持落去既,搞搞吓就會了無興趣可言。我哋係事不事需要shake up 一吓,換吓方法同節奏,調劑心情之餘,亦希望可以有所得著。娘啲講係趁勢富豐吓人生經驗,等自己有多啲唔同既領悟,從而可以睇到更多更遠。

錄完post完隻歌後其實對自己既表現唔太滿意,畢竟呢啲「演嘢」既歌,都要幾專業既水平先有足夠斤兩彈得好。區區廿二日,彈得晒叫做做到第一層,往上仲有好多級可以走哩。

點都好啦,都集中精神乜都拋開晒咁去練,最後一個星期我練步都唔跑,仲有一日請假唔返工煲添。而家事情已經過去咗,都應該好好規劃返自己個routine,想想下一個屆段點樣先可以開心又精彩咁走落去。

首先我放咗自己兩日假。係兩日完全唔彈琴既日子。想俾自己啲手指休息吓,特別係裂咗既左尾指肉埋返口先。

第三日再次彈返放低咗成個月首莫札特奏鳴曲。咦,大致都喺返度,可以開始嘗試背了。至於我隻「生日歌」呢?哈,所有需要挑戰技巧既地方全面甩晒,好似生日前七日所有既練習完全冇發生過咁。

「由頭練過」,係學琴其中一樣不時要做既嘢。放低自己原有既包袱,先至可以走出一條不同而又更好既路。喺不段永無止境既重覆吓,期望可以有新既發現與體會,尋找更多既樂趣。

--

--

玩完喇 – 最終條片四分幾鐘,即係彈唔到應有既速度啦。 提速呢啲嘢,係冇捷徑既。冇啱既方法、同埋俾心機時間,係練唔到上去既。今次用咗廿二日,叫做彈得晒,但去到下半首每四小節就有新花款既花式,實在係好大既挑戰。 練到最後三日,好明顯係太耐冇認真練琴啦,左手尾指指甲因為不斷重覆擠壓而𠝹開咗啲手指肉,每用一次隻左尾指就痛一下。好彩個裂口唔算深,冇血滲出嚟。因此,嗰幾日直到拍攝時,左尾指都係包住膠布以固定住個裂口,咁彈落去就唔會痛。不過由於觸感唔同咗,要花咗啲時間去重新適應。若眼利應可以見到我左尾指係用塊所謂既透明膠布包住既。 到錄既時候,由於想用早上剛天光都市景做背景,六點天快光時就起身練住先。我又搞咗幾個月都未搵到點樣用數碼鋼琴既輸出直接收音,只好現場收音,所以亦唔可太早開始開聲彈。練到差唔多八點先開始第一個take。 前後錄咗七八次,頭幾次一有個鏡頭對住就緊張起嚟,搞到句句都彈錯。之後掌握返個自己較有把握住持穩定既速度,終於錄到一次就算有錯都喺唔睇住譜都未必太覺既版本,就收貨算啦。其實頭幾次錄時覺得都錯得幾難見得人,有諗過不如逐句錄然後剪埋一齊,但咁欺場既嘢暫時未過到自己嗰關(留返下次啦),所以彈得點衰都想出個一take過既版本。

玩完喇 –

最終條片四分幾鐘,即係彈唔到應有既速度啦。

提速呢啲嘢,係冇捷徑既。冇啱既方法、同埋俾心機時間,係練唔到上去既。今次用咗廿二日,叫做彈得晒,但去到下半首每四小節就有新花款既花式,實在係好大既挑戰。

練到最後三日,好明顯係太耐冇認真練琴啦,左手尾指指甲因為不斷重覆擠壓而𠝹開咗啲手指肉,每用一次隻左尾指就痛一下。好彩個裂口唔算深,冇血滲出嚟。因此,嗰幾日直到拍攝時,左尾指都係包住膠布以固定住個裂口,咁彈落去就唔會痛。不過由於觸感唔同咗,要花咗啲時間去重新適應。若眼利應可以見到我左尾指係用塊所謂既透明膠布包住既。

到錄既時候,由於想用早上剛天光都市景做背景,六點天快光時就起身練住先。我又搞咗幾個月都未搵到點樣用數碼鋼琴既輸出直接收音,只好現場收音,所以亦唔可太早開始開聲彈。練到差唔多八點先開始第一個take。

前後錄咗七八次,頭幾次一有個鏡頭對住就緊張起嚟,搞到句句都彈錯。之後掌握返個自己較有把握住持穩定既速度,終於錄到一次就算有錯都喺唔睇住譜都未必太覺既版本,就收貨算啦。其實頭幾次錄時覺得都錯得幾難見得人,有諗過不如逐句錄然後剪埋一齊,但咁欺場既嘢暫時未過到自己嗰關(留返下次啦),所以彈得點衰都想出個一take過既版本。

結果就係呢個樣,亦係我送俾自己既生日禮物。雖然只係「學徒級」既水準(即大致算得上係彈晒啲音出嚟咁話啦),但呢廿二日既經歷過程係難得既,亦對練琴、專注、心理調適等都有所得著。

嚟緊我想背咗呢隻歌,兼彈「好啲」,去到可以「呃倒未彈過呢隻歌既人」既水平(可以話係「江湖賣藝級」卦),不過恐怕要多二百廿幾日喇。

--

--