K576第一樂章

三個月前寫過一篇講莫扎特既奏鳴曲，當時就係剛剛開始彈呢首歌，摸緊啲音既階段。擾擾攘攘咗幾個月，背咗首歌，想喺叫做彈得熟時錄低咗佢，免得生疏之後彈唔返又唔想又頭練過。

結果搵咗日公假冇咩嘢做(因為瘟疫強勢回歸又就快封城喇)，一頭汗咁錄足一日。

查實自己平時彈，有啲甩漏冇乜所謂，自己爽就得。到要錄底時，好多平時唔覺唔覺既窿就萬倍放大出嚟，心緒總是不靈，每一猶疑就彈錯，一錯就兜唔返，好好地一首歌就咁冚包散。

所以去到最後，要剪埋三個片斷先至成到一隻「聽」落完整既版本。「睇」就唔完整喇，次次彈時體位都唔同，大家唔介意就唔好睇齋聽啦。

為咗整條片，又逼自己學多咗少少iMovie既剪接功能——我就係咁即食，即學即用；日常想認真學，一係就半途(其實係十劃得一撇時)而廢，一係就水過鴨背，轉頭就唔記得。上次用iMovie時已係被迫(又係被迫)要整條三幾分鐘既所謂童年片結婚party時用，當時學到啲嘢，今次都算用得返吓。

至於點解揀呢首歌？我都係睇返LRSM 個syllabus有呢隻歌可以攞嚟玩吓，慰藉吓自己雖然過咗廿幾年，而家仍可以扮自己有呢個程度咁啦。後來練得辛苦，份譜睇落冇嘢但彈極都手指打結，上網週圍google吓，發覺原來呢首都算得上係公認莫扎特最難彈既奏鳴曲。

既然係咁，就唔爭在彈埋第二同埋第三段啦。等我。