去緊旅行時冇得練琴喎

對於有習慣定時候維持一種習慣既人既到講，因為出差外遊而要中斷本來適應咗既節奏係會感到不安既。

做運動都好啲，因為今時今日多數酒店旅館好好醜醜都會有少少健身設施，咁喺外遊時攞一頭半個鐘睡前睡後時間出嚟(尤其是當有時差既時候，都唔會點訓得著)都可以運動吓。跑步就仲好，治安ok時仲可以落街跑。

音樂練習就唔同喇。邊度搵件樂器出嚟俾你練。帶埋去旅行？其實除咗木管樂較為「可攜」之外，其他都大大件，要上飛機(特別是廉航)仲要加錢，搵嚟搞。當你有錢有心真係帶埋去玩，喺酒店或街上練習都唔係一般社會樂意接受既行為，因為你以為係音樂既嘢，對於多數普遍冇乜音樂歷練既人嚟到講，只係燥音。出得去外面，人生路不熟，無謂惹事生非啦。

咁可以點？我會聽吓首練緊既歌，最好就搵幾個唔同既版本去聽。有時要等登揀啲自己唔鐘意既版本，唔喜歡既演澤方法去逼自己聽。因為進步，好多時就係要有衝激時先至會出現。既然都無法物理上練習，就俾自己既意識同腦袋一啲鍛練，要自己挑剔或學會欣賞自己本來唔prefer既版本。咁樣做，就有機會額外提升本來自己死鋤硬練時得唔到既進展添。

當然，出得去換個模式活著，更撇脫既方法係完全放下，乜都唔理，俾啲disruption自己，冷卻一下自己綳緊既神經。等旅程結束後重新日常生活時，話唔定對練緊既歌會有新既體會，發現新既樂趣，就好似少別勝新婚咁，可能會有意外之喜哩！